Futbol bo‘yicha Ispaniya kubogining chorak finalga yo‘llanma olgan barcha jamoa nomiga oydinlik kiritildi. Avvalgi kunlarda Madridning “Atletiko” va Kataloniyaning “Barselona” klublari o‘zi uchun kerakli natijani qayd eta olgandi.
1/8 final bosqichida “Sevilya” bilan to‘qnash kelib qolgan Zinedin Zidan boshqaruvidagi “Real” “Santyago Bernabeu”da 3:0 hisobida zafar quchgandi. Safarda bo‘lib o‘tgan o‘yinda ham madridliklar 3 ta gol urishga muvaffaq bo‘ldi. Shu bilan birga o‘z darvozasidan ham shuncha gol o‘tkazib yubordi.
O‘yinning 77-daqiqasiga kelib Xorxe Sampaoli boshqaruvidagi “Sevilya” 3:1 hisobida oldinda borayotgandi. Jamoaga yangi qo‘shib olingan Stevan Yovetich ham “Real” darvozasiga yo‘l topgandi. Keyinroq esa uchrashuv yakuniga qadar “Real” ikki bor raqibi darvozasiga yo‘l topdi. Avvaliga Serxio Ramos penaltini aniq amalga oshirgan bo‘lsa, hakam hushtagi chalinishiga sanoqli soniyalar qolganida zaxiradan maydonga tushgan Karim Benzema “Real”ni mag‘lubiyatdan qutqarib qoldi — 3:3.
Bu “Real”ning ketma-ket 40-mag‘lubiyatsiz seriyasi bo‘ldi. Ispaniya klublaridan hozirgacha hech kimga mana shunday uzoq mag‘lubiyatsiz seriya nasib qilmagandi. Bir hafta muqaddam “Barselona”ning 39 ta o‘yinlik mag‘lubiyatsiz seriyasini takrorlagan “Qirollik klubi”, bu safar o‘sha rekordni yangiladi.
Ispaniya kubogi 1/8 final 12-yanvar, payshanba
“Eybar” — “Osasuna” 0:0
Dastlabki o‘yin: 3:0“Selta” — “Valensiya” 2:1
Gollar: Juzeppe Rossi, 61 (1:0). Vinisius Araujo, 63 (1:1). Pione Sisto, 90+3 (2:1).Dastlabki o‘yin: 4:1
“Sevilya” — “Real Madrid” 3:3
Gollar: Danilo, 10-avt (1:0). Marko Asensio, 48 (1:1). Stevan Yovetich, 53 (2:1). Visente Iborra, 77 (3:1). Serxio Ramos, 83-pen (3:2). Karim Benzema, 90+3 (3:3).Dastlabki o‘yin: 0:3
Izoh (0)