Xalqaro futbol uyushmasi FIFA prezidenti etib Janni Infantino tayinlangach, har to‘rt yilda bir marotaba o‘tkaziladigan jahon chempionati ishtirokchilari sonini 32 tadan 48 taga yetkazish g‘oyasi ilgari surilgandi. “Sports.ru” xabariga ko‘ra, FIFA seshanba kuni bu masalani amalga tadbiq qiladi.
Ma’lumki, JCh—2018 Rossiyada, JCh—2022 esa Qatar mamlakatida bo‘lib o‘tadi. 2026-yilgi mundial mezboni masalasi esa hal etilmagan. FIFA ishtirokchilar 48 taga qadar yetadigan jahon chempionatini aynan 2026-yildan boshlab o‘tkazadi.
Taxminlarga ko‘ra, bu holatda 16 ta guruh tashkil etilib, ularning har birida 3 tadan mamlakat 1/32 final uchun kurash olib boradi. Ya’ni, guruhda eng yaxshi natija qayd etgan ikki jamoa yurishini davom ettiradi.
Mundial ishtirokchilari soni 16 taga oshgach, konfederatsiyalar uchun taqdim etiladigan kvotalarda ham o‘zgarish yuz beradi. Unga ko‘ra, FIFA Yevropa qit’asi uchun 16 ta joy ajratishni rejalashtirgan. Bu ko‘rsatkich Afrikada 9,5 tani, Osiyoda 8,5 tani, Janubiy va Shimoliy Amerikada 6,5 tani tashkil qiladi. Shuningdek, OKEANIYA yaxlit 1 ta yo‘llanmaga ega bo‘ladi.
Ma’lumot uchun, JCh—2018 yo‘lida Osiyo qit’asiga 4,5 ta kvota ajratilgan. Unga ko‘ra, 4 ta mamlakat saralashni muvaffaqiyatli yakunlab, Rossiya mundialiga to‘g‘ridan-to‘g‘ri yo‘llanmani qo‘lga kiritadi. O‘z guruhida 3-o‘rinni olgan ikki mamlakat esa o‘zaro plef-off o‘yinida ishtirok etadi. G‘olib jamoa qit’alararo pley-offda to‘p suradi.
JCh—2018 saralashining hal qiluvchi bosqichi 1-davrasi yakuniga ko‘ra, O‘zbekiston milliy terma jamoasi o‘z guruhida 3-o‘rinni egallab turibdi. Bu esa to‘g‘ridan-to‘g‘ri yo‘llanma uchun kamlik qiladi. 2026-yilgi reja amalga oshsa, o‘z guruhida 4-o‘rinni egallab turgan jamoalar ham mundialga to‘g‘ridan-to‘g‘ri yo‘llanma olgan bo‘lardi.
Izoh (0)