BMW kompaniyasi yangi avlod 5-Series sedanini to‘laqonli avtonom boshqaruv tizimi bilan ta’minladi. “Motor”ning yozishicha, firmaning avtopilot ishlanmalari yo‘nalishidagi muvaffaqiyatlari namunasi sifatida tayyorlangan prototip Las-Vagesda tashkil etilgan CES maishiy elektronika ko‘rgazmasida namoyish etilgan.
Yangi avtopilot – BMW’ning hozirda seriyalab ishlab chiqarilayotgan modellarida uchraydigan haydovchining elektron yordamchilarining yaxshilangan versiyalaridir. Ayni vaqtda, prototip avtomobilni o‘rab turgan makonning raqamli xaritasini tuzishga imkon beruvchi maxsus uskuna bilan ta’minlangan.
Bundan tashqari, yangi “beshinchi”ning negizidagi prototip Robot Valet Parking funksiyasiga ham ega bo‘lgan. Bu to‘liq avtonom ravishda avtoturargohga joylashish tizimidir – haydovchi mashinani tark etib, uni avtoturargohga yo‘llashi mumkin (katta ehtimol bilan, bu smartfondagi maxsus mobil dastur yoki BMW’ning “aqlli” kaliti yoramida amalga oshiriladi). Haydovchining buyrug‘i bo‘yicha, avtomobil ortga ham qaytib kela oladi.
BMW avtopilot ustidagi ishlanmalarni 2000-yillarning oxirida boshlagan. Avvalroq firma eski avlod 5-Series’ning negizida tizimning dastlabki versiyasini sinovdan o‘tkazgan edi. Sinovlar doirasida sedan Myunxendan Nyurnberggacha bo‘lgan 170 kilometr masofani to‘liq avtopilot tartibida bosib o‘tgan.
2014-yili kompaniya to‘rt eshikli 6-Series Gran Coupe va 2-Series kupesi negizida ham prototiplar tayyorlagan bo‘lib, ular mustaqil ravishda, avtopilot tartibida trek bo‘ylab poyga tezligida harakatlangan va haydovchining hech bir ishtirokisiz drift qilgan.
BMW to‘liq avtopilotli modellarni 2020-yildan boshlab seriyali tarzda ishlab chiqarishni rejalashtirmoqda.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)