Tramp OAVlarni uni maxsus xizmatlarning dushmani deb ko‘rsatishga urinishda aybladi

AQShning saylangan prezidenti Donald Tramp uning razvedka xizmatlarini yoqtirmasligi haqida xabar bergan OAVlarni tanqid qildi, deb yozadi “RBK”.

“Insofsiz OAVlar mening Julian Assanj (WikiLeaks yaratuvchisi) bilan bir yoqadan bosh chiqarganim haqida yozishni xush ko‘radi. Bu yolg‘on. Shunchaki, men u aytgan narsalarni aytaman, xolos: ya’ni odamlar haqiqatni bilishga intilishi kerak. OAVlar meni razvedka dushmani qilib ko‘rsatib, yolg‘on gapiradi. Aslida esa men uning ashaddiy muxlisiman”, — deb yozdi Tramp o‘z Twitter’ida.

Avvalroq The Wall Street Journal Tramp go‘yoki o‘z maslahatchilari bilan AQSh Milliy razvedkasi, shuningdek, Markaziy razvedka boshqarmasi direktorlar ofisini isloh qilish borasida maslahatlashuvlar o‘tkazayotganini ma’lum qilgan edi.