3-fevral kuni jahon boks seriyasi musobaqasining 2017-yilgi mavsumi start oladi. Unda O‘zbekiston sharafini himoya qiladigan Uzbek Tigers turnirga tayyorgarlik boshladi.
“Olamsport” nashri o‘zbekistonlik charm qo‘lqop ustalari Toshkent viloyatidagi Yangiobod o‘quv-mashg‘ulot bazasida tayyorgarlik ko‘rayotganiga oydinlik kiritdi. O‘zbekiston boks federatsiyasi matbuot xizmati esa “Daryo”ga Uzbek Tigers tarkibiga kirishi mumkin bo‘lgan 30 nafar bokschi nomini taqdim etdi.
Bokschilar 10 ta vazn toifasiga ajratilgan bo‘lib, har bir vazn uchun 3 nafardan nomzod tanlab olingan. Ular orasida Rio—2016 Olimpiadasida oltin medalni qo‘lga kiritgan Fazliddin G‘oibnazarov va bronza medali egasi Rustam To‘laganov kabi nomlar yo‘q. Qayd etish kerak, Rustam To‘laganov yaqindagina oila qurgandi.
Ular qatorida Rio—2016 ishtirokchisi bo‘lib, yakunda medallarsiz qolgan Elshod Rasulov hamda Xurshid Tojiboyev kabi bokschilar ham termaga yordam bermaydi.
Chempionlardan Hasanboy Do‘stmatov (-49 kg) va Shahobiddin Zoirov (-56 kg) Uzbek Tigers sharafini himoya qilishga da’vogarlar safida bor. Rio—2016 medallarini qo‘lga kiritgan bokschilardan Shahram G‘iyosov (-69 kg), Murodjon Ahmadaliyev (-60 kg), Bektemir Meliqo‘ziyev (-81 kg) kabi sportchilar ham mashg‘ulotlarga kirishgan.
Olimpiada yo‘llanmasini qo‘lga kiritganiga qaramay, yakunda terma jamoa safidan tushib qolgan Elnur Abduraimov -64 kilogram vazn bilan ro‘yxatga qo‘shilgan. Rioda O‘zbekiston bayrog‘ini ko‘tarib chiqqan, biroq yakunda sovrindor bo‘la olmagan Bahodir Jalolov ham Uzbek Tigers asosiy tarkibi uchun kurash olib boradi.
Ma’lumot uchun, Uzbek Tigers o‘z guruhida Rossiyaning Russian Boxing Team, Qozog‘istonning Astana Arlans hamda Xitoyning China Dragons jamoalariga qarshi kurash olib boradi. Birinchi janglar 3-fevral kuni Xitoyda bo‘lib o‘tadi.
Astana Arlans jamoasi 2013 va 2015-yilgi turnirlarda g‘oliblikni qo‘lga kiritgandi. 2014 va 2016-yillarda esa chempionlik Kubaning Cuba Domadores’ga nasib qilgan. Uzbek Tigers 2016-yilgi mavsumdan boshlab turnirga qo‘shilgan bo‘lib, yarim finalga qadar yetib borgan va o‘sha bosqichda Kuba jamoasidan yengilgan. Cuba Domadores g‘alabasi bilan yakuniga yetgan final o‘yinlariga Toshkent shahri mezbonlik qilgan.
Izoh (0)