Fransiyalik Zineden Zidan Madridning “Real” klubi bosh murabbiyi sifatida tanishtirilganiga bugun — 4-yanvar kuni 1 yil to‘ldi. U ispaniyalik Rafael Benitesning o‘rniga bosh murabbiy etib tayinlgandi.
O‘tgan bir yil davomida “qirollik klubi” Zidan boshqaruvida 53 ta uchrashuv o‘tkazdi va shularning 41 tasida g‘alabaga erishdi. 10 ta o‘yinda g‘olibni aniqlab bo‘lmagan va faqatgina 2 tasida Zidan maydonni boshi egik holda tark etgan.
Zidanning tashrifidan keyin “Real” Yevropa chempionlar ligasi va Superkubogida zafar quchdi, klublar o‘rtasidagi jahon chempionatida muvaffaqiyat qozondi.
La liganing joriy mavsumida yetakchi bo‘lib turgan “Real” bugun — 4-yanvar kuni qishki tanaffusdan keyingi ilk o‘yinni “Sevilya”ga qarshi o‘tkazadi. Toshkent vaqti bilan 5-yanvarga o‘tar kechasi 01:15 da start oladigan uchrashuv Ispaniya kubogi doirasida bo‘lib o‘tadi.
Ispaniya kubogi 1/8 finalidan joy olgan 4 ta o‘yin natijasi bilan shu havolada tanishish mumkin. Bugun “Real Sosyedad” va “Vilyarreal” klublari o‘rtasidagi o‘yin ham o‘tkaziladi, “Barselona”ning “Atletik”ka qarshi o‘yini esa 5-yanvarga tayin qilingan.
Izoh (0)