Xitoyda Chevrolet Lova RV universalining yangi modifikatsiyasi sotila boshladi, deb yozadi “O‘zavtosanoat”. Modelning alohida versiyasini multfilm qahramoni Mikki Maus sharafiga Mickey deb atashdi.
Chevrolet Lova RV’ning yangicha varianti Disney kompaniyasining Xitoydagi bo‘linmasi bilan hamkorlikda ishlab chiqildi. Mickey modifikatsiyasining tashqi ko‘rinishi standart universaldan kapoti va orqa oynasiga yopishtirilgan Mikki Maus quloqlari yorlig‘i, sariq rangdagi tashqi oynalari kabilar bilan farq qiladi. Yangi avtomobilga, shuningdek, qora-qizil interyer o‘rnatildi.
Maxsus versiyani to‘rt tezlikli avtomatik uzatish qutisi bilan sotib olish mumkin. Yangi modifikatsiyaning narxi 99 900 yuan (14 300 dollar)dan boshlanadi. Oddiy universalning narxi esa 74 900 yuan (10700 dollar)dan boshlanadi. Chevrolet Lova RV Xitoydan tashqarida sotilmaydi.
Izoh (0)