Xalk va Ahmedovni Rossiyadan chaqirib olgan Villash-Boash, belgiyalik Aksel Vitselni Fabio Kannavaroga boy berdi

Sankt-Peterburgning “Zenit” klubi a’zosi Aksel Vitsel faoliyatini Xitoyning “Tyanszin Syuanszyan” klubida davom ettiradi. Bu haqda “Chempionat” italiyalik jurnalist Fabritsio Romanoning tvitiga asoslanib ma’lumot berdi.

Sky Sport, The Guardian kabi mashhur nashrlar bilan hamkorlik qiladigan jurnalist belgiyalik futbolchining Xitoyga transfer qilingani haqida birinchi bo‘lib xabardor qildi. Vitsel faoliyatini italiyalik Fabio Kannavaro ustozlik qilayotgan jamoada davom ettiradi.

Avvalroq Vitselning xizmati bilan Andre Villash-Boash ustozlik qilayotgan “Shanxay SIPG” ham qiziqayotgani aytilgandi. Biroq futbolchi “Tyanszin Syuanszyan” tomonidan taklif etilgan 4 yillik shartnomaga imzo chekdi. Uning har yilida Vitsel 18 million yevrolik bo‘ladi.

Aksel Vitsel bilan Turinning “Yuventus” klubi ham jiddiy qiziqib, “Zenit” bilan muzokarani boshlab yuborgandi.

Tanlovda bir qarorga kelish qiyin bo‘ldi. Bir tomondan juda ajoyib klub “Yuventus” qiziqayotgandi, boshqa tomondan esa oilamni har taraflama qanoatlantirayotgan Xitoy klubi. Men esa ikkinchi variantga rad javobini bera olmasdim.

“Yuventus” rahbariyati o‘zini jentelmenlarga hos tutdi. Ulardan minnatdorman. Klubning ishlarida omad tilab, Chempionlar Ligasida zafar quchishini istashimni aytaman. Kim biladi, taqdir keyinchalik men va “Yuventus”ni yana yuzlashtirar.

Aksel Vitsel, “Tyanszin Syuanszyan” a’zosi

Andre Villash-Boash “Shanxay SIPG”da ko‘rishni istagan xorijlik uch futbolchisidan ikkitasiga erishdi: Oskar va Xalk. Osiyolik legioner limiti esa o‘zbekistonlik Odil Ahmedov bilan to‘ldirildi. Ayni vaqtda bu uch futbolchi Xitoyga yetib borgan.

Vitsel esa endi Fabio Kannavaro ustozlik qilayotgan jamoada to‘p suradi.