BMT Xavfsizlik kengashi Istanbuldagi tungi klubda uyushtirilgan terrorchilik hujumini qoraladi

BMT Xavfsizlik kengashi Istanbuldagi tungi klubda uyushtirilgan terrorchilik hujumini qoraladi. Bu haqda xalqaro tashkilot matbuot xizmati ma’lum qildi, deya xabar beradi “Korrespondent.net”.

“Xavfsizlik kengashi a’zolari dahshatli va manfur terrorchilik hujumini keskin qoralaydi. Qurbonlarning oilasiga chuqur hamdardlik bildiramiz, jarohatlanganlar tezroq sog‘ayib ketishini tilaymiz. Terakt tashkilotchilari va homiylari javobgarlikka tortilishi lozim, shu bois barcha davlatlarni Turkiya hukumati bilan faol hamkorlikka chaqiramiz”, — deyiladi tashkilot saytida joylashtirilgan press-relizda.

Shuningdek, Xavfsizlik kengashi a’zolari terrorchilikning istalgan shakli dunyo xavfsizligi uchun eng katta tahdid ekanligini ta’kidladi.

Eslatib o‘tamiz, oldinroq mazkur terakt uchun javobgarlikni IShID o‘z zimmasiga olgani ma’lum qilingandi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.