AQSh hukumati mamlakatdan chiqarib yuborayotgan rus diplomatlari Rossiyaga uchish uchun chipta xarid qilishda muammolarga duch kelmoqda. Bu haqda “Interfaks” xabar berdi.
“Chiptalar yo‘q, Yangi yil oldidan sotib bo‘lingan. Ularga esa mamlakatdan chiqib ketish uchun atigi 72 soat muhlat berildi. Badarg‘a qilinayotgan diplomatlar Vashingtondan Moskva reysiga bo‘sh joy topish imkoniyati yuqoriroq Nyu-Yorkka borishga majbur bo‘lmoqda. Ular Yangi yilni samolyotda kutib olishiga to‘g‘ri keladi. Bu kutilmagan yangilik bo‘ldi, diplomatlar bayramni nishonlashga tayyorgarlik ko‘rayotgandi”, — deya ma’lum qildi agentlikka o‘zini oshkor etishni istamagan manba.
Boshqa bir manbaga ko‘ra, Rossiyaning Nyu-Yorkdagi vakolatxonasi dala hovlisi oldida politsiya xodimlari to‘planayotgani kuzatilmoqda. “Bu qurshov emas, albatta, vertolyotlar uchmayapti, lekin baribir kishiga ta’sir qiladigan holat”, — deb ta’kidladi manba.
Eslatib o‘tamiz, 29-dekabr, payshanba kuni AQSh Davlat departamenti 35 nafar rossiyalik diplomatni “persona non grata” — mamlakatda bo‘lishi istalmagan shaxs deb e’lon qildi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)