AQSh Davlat departamenti 35 nafar rossiyalik diplomatni “persona non grata” — mamlakatda bo‘lishi istalmagan shaxs deb e’lon qildi, deb yozadi “RBK” muassasa xabariga tayanib. Bayonotga ko‘ra, ular “o‘zlarining diplomatik yoki konsullik maqomiga mos bo‘lmagan tarzda” faoliyat yuritgan.
Bunday choralar “Rossiyaning AQShdagi saylovlarga aralashuvi”, shuningdek, amerikalik diplomatlarning doimiy ravishda xorijda “ta’qib etilishi”ga javob sifatida qabul qilindi.
Davlat departamenti ma’lumotlariga ko‘ra, AQSh diplomatlarining “ta’qib qilinishi” so‘nggi to‘rt yil ichida “o‘sgan”, so‘nggi 12 oyda esa “keskin o‘sish”ni ko‘rsatgan.
Reuters xabariga ko‘ra, Vashingtondagi elchixona va San-Fransiskodagi konsulxona xodimlari mamlakatdan chiqarib yuboriladi, ularga AQShni tark etish uchun 72 soat vaqt berilgan. Ammo bu chora Rossiyaning AQShdagi elchisi uchun amal qilmaydi.
Shuningdek, AQSh hukumati Rossiya diplomatik missiyalarining Nyu-York va Merilendda shahar tashqarisidagi ikkita qarorgohini yopadi. Ushbu binolar, Reuters manbalariga ko‘ra, “razvedka ma’lumotlari”ni to‘plash uchun qo‘llanilgan.
Izoh (0)