Futzal bo‘yicha O‘zbekiston terma jamoasining yetakchi o‘yinchilaridan biri Dilshod Rahmatov faoliyatini Xitoyda davom ettiradi. Bu haqda “Championat.asia” sayti ma’lumot berdi.
Xitoy ligasida peshqadam bo‘lib turgan “Dalyan Puvan Anbo” klubi Dilshod Rahmatov bilan 1 yillik shartnomaga imzo chekkan. Futzalchining faoliyati risoladagidek bo‘lsa, shartnoma yana 1 yilga uzaytirilishi mumkin.
Ma’lumot uchun, “Dalyan Puvan Anbo” Xitoy chempionatining amaldagi vitse-chempioni hisoblanadi. Mamlakat futzal ligasida 10 ta jamoa chempionlik uchun kurash olib boradi.
27 yoshli Dilshod Rahmatov avval ham Xitoy chempionatida to‘p surgan. So‘nggi jamoasi Toshkentning “Ardus” klubi bo‘lgan futzalchi, unga qadar “Gansu Masrey” safida ham harakat qilgan. Biroq O‘zbekiston terma jamoasining Osiyo Chempionati va shu yo‘l orqali Jahon Chempionatiga tayyorgarlik ko‘rishi inobatga olinib, O‘zbekistonga chaqirib olingandi.