Futboldan keyin g‘irt bekorchiga aylangan “Paxtakor”ning sobiq futbolchisi ukalariga o‘qish kerakligi haqida aytdi

Bir yil muqaddam futbolchilik faoliyatini yakunlagan Renat Bayramov bilan suhbat “Championat.asia” saytida chop etildi.

Toshkentning “Paxtakor” klubi safida bir necha bor mamlakat chempionligi va kubogini qo‘lga kiritgan futbolchi ayni vaqtda bekorchilik bilan band ekanini qayd etib o‘tgan.

Tayinli ish bilan mashg‘ul emasman. Inson xohlagan hamma narsasiga erishmas ekan. Istak boshqa, uning ro‘yobi boshqa. Oldinda sizni qanday taqdir kutayotganini bilmas ekansiz.

Renat Bayramov, sobiq futbolchi

Renat Bayramovni 2005-yilgi mavsum oldidan Tachmurod Agamurodov “Paxtakor” safiga jalb qildi. Unga qadar bo‘lgan ikki yilida esa Namanganning “Navbahor” klubida to‘p surgan va ikki bor chempionatning bronza medallariga ega chiqqan.

Dog‘istonda tug‘ilganman. Uch yoshimda oilam Zarafshon shahriga ko‘chib kelgandi. Yagona o‘g‘il farzand edim, ikki nafar singlim bor. “Qizilqum” bolalar futbol maktabida to‘p tepish orqali katta futbolga kirib keldim.

Berilgan maslahatlarga amal qilib, Qirg‘iziston yuridik institutiga o‘qishga kirgandim. Keyin uni tashlab ketdim.

Renat Bayramov, sobiq futbolchi

“Paxtakor”ning sobiq futbolchisi o‘qimaganidan afsusda ekanini yashirmagan. Aynan shu holat uning bugun bekorchiga aylanib qolishi uchun sabab ekanini tushuntirishga harakat qilgan.

Afsuski, oliy ma’lumotim yo‘q. Endi olishga ham kech bo‘ldi. Institutda vaqtida o‘qimay, uni tashlab ketgandim. Shu boisdan ham hamma aybni o‘zimda deb bilaman. Hozir bunga afsus qilaman.

“Paxtakor”da chempion bo‘lib, O‘zbekiston davlat jismoniy tarbiya institutiga kirishim mumkin edi. Nega shunday qilmaganimga hayronman. Bugungi yoshlarga futbol bilan parallel ravishda o‘qishlarini tavsiya qilaman. Shunda ular menga o‘xshab afsus chekishmasa kerak.

Renat Bayramov, sobiq futbolchi

Futbolchi futbolsiz hayotdan jinni bo‘lib qolay deyayotganini yashirmagan. Bunday hayot qachongacha davom etishini esa faqatgina Yaratgan bilishini ta’kidlagan. Uning aniqlik kiritishicha, “Xorazm” klubi safiga qo‘shilganidan keyin sport formasini batamom yo‘qotgan.