Boxing Day. “Suonsi” yangi murabbiyini 3 oydan keyinoq bo‘shatib yubordi, “Chelsi” murabbiyi Konte esa jurnalistlarni ichimlik bilan siyladi

Futbol bo‘yicha Angliya Premyer-Ligasi ishtirokchisi hisoblangan Uelsning “Suonsi” klubi bosh murabbiy Bob Bredlini o‘z vazifasidan ozod etdi.

Bredli “Suonsi”ni qabul qilib olganiga 3 oy ham bo‘lmagandi. Shu yilning 4-oktabr kuni u Franchesko Gvidolin o‘rniga yangi mutaxassis etib tayinlangandi.

Uning boshqaruvida “oqqushlar” Premyer-Liga doirasida 11 ta o‘yinda maydonga tushdi: 2 ta g‘alaba, 2 ta durang va 7 ta mag‘lubiyat. Bu esa rahbariyatni qanoatlantirmadi. Chempionatning 18-turidan keyin “Suonsi” 12 ochko bilan 19-o‘rinni egallab turibdi.

Avvalroq Londonning “Kristal Pelas” klubi bosh murabbiy Alan Pardyuni iste’foga chiqarib, uning o‘rnini Sem Ellardaysga bergandi.

Rayan Giggz

“Manchester Yunayted” klubining sobiq futbolchisi “Suonsi”ni boshqarishi mumkin bo‘lgan eng yaxshi nomzod bo‘lib turibdi. Tomonlar muzokara boshlagani haqida aniq xabar yo‘q.

Giggz mustaqil ravishda faoliyat olib borish vaqti kelgan deb hisoblasa, “Suonsi”dagi bosh murabbiylik kursisini egallashi mumkin. Jamoa yil oxirigicha katta ehtimol bilan unga imkoniyat beradi. Bitta mavsumda 2 bor murabbiy almashtirish esa mantiqan to‘g‘ri emas.

“Liverpul”dan yangi rekord

Yurgen Klopp jamoasi bir vaqtlar Brendan Rojers o‘rnatib ketgan rekordni yangiladi. 2013-yilgi mavsum davomida “Liverpul” raqiblar darvozasiga 84 ta gol urgandi.

2016-yil boshidan buyon esa jamoani Klopp boshqarib kelmoqda. O‘zining ixtiyorida yana 1 ta o‘yini bor bo‘la turib “Liverpul”, 2016-yil hisobidan 86 ta gol urib bo‘ldi. Rekordni yangilagan gollar “Stok Siti” darvozasiga kiritildi.

Antonio Kontedan yangi yil sovg‘asi

O‘z rekordini yangilash bilan band bo‘lgan APLning yana bir klubi “Chelsi”da ishlar joyida. Ketma-ket 12 ta g‘alabani qo‘lga kiritgan jamoa bosh murabbiyi Antonio Konte “Bornmut”ga qarshi yirik g‘alaba bilan yakuniga yetgan uchrashuvdan keyin barcha jurnalistlarni stadion yaqinidagi pabga taklif qildi.

Jurnalistlarning ishontirib aytishicha, Konte ularni Rojdestvo bilan qutlagan va har biriga yaxshi pivodan buyurtma berib, ularni siylagan.

Joze Mourinyo

Ketma-ket to‘rtta g‘alaba “Manchester Yunayted” bosh murabbiyi Joze Mourinyoning kayfiyatini ko‘tarib yubordi va u Pol Pogba sha’niga bisotidagi jamiki chiroyli so‘zlarni armug‘on qildi.

APL — qiyin liga. Italiyada 3—4 mavsum o‘ynab, Angliyaga kelib qolsang, o‘zingni boshqa dunyoga tushib qolgandek his qilasan. Shunga qaramay Pogba yaxshidan ham yaxshiroq o‘ynamoqda. Ishonchim komilki, u kelasi mavsum eng yaxshi bo‘ladi.

Hozir vaziyat shunday, “Oltin to‘p”ni yutish uchun hujumchi bo‘lishing kerak. Agar bu hol o‘zgarsa, unda Pogba “Oltin to‘p” uchun asosiy da’vogar. U ajoyib yarim himoyachi, men uchun u eng zo‘ri.

Joze Mourinyo — “Manchester Yunayted” bosh murabbiyi

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.