Ukrainaning “Vorskla” klubi safida harakat qilayotgan o‘zbekistonlik futbolchi Sanjar Tursunov “Futbol Ekspress” nashriga intervyu berib, uning uchun terma jamoa eshiklari yopilmagani haqida ma’lum qildi.
“Babayan boshqaruvidagi termada maydonga kam tushdim. So‘nggi bir yilni olsak, hammasi bo‘lib 15—20 daqiqa o‘ynadim, xolos. O‘ylashimcha, men uchun terma eshiklari yopilmagan. Axir bu milliy terma jamoa, unga chaqirishsa, qo‘limdan kelganicha yordam berishga tayyorman”, — deb ta’kidlagan Sanjar Tursunov.
Ma’lumot uchun, Sanjar Tursunov harakat qilayotgan “Vorskla” Ukraina chempionatida 18-turdan keyin 6-o‘rinni egallab turibdi. Tursunov hozirga qadar 11 ta o‘yinda maydonga tushgan bo‘lib, raqiblar darvozasiga 3 ta gol urishga muvaffaq bo‘lgan. Jumladan u “Volin”, “Dnepr” va Kiyevning “Dinamo” klublariga qarshi o‘yinlarda muvaffaqiyat qozongan.
Avvalroq Sanjar Tursunov jamoasidagi muammolar haqida to‘xtalib, o‘zi va jamoadoshlari bir necha oydan buyon oylik-maosh olmayotgani haqida aytib o‘tgandi.
Izoh (0)