Rossiya bosh vazirining o‘rinbosari 70 kishining o‘limiga sabab bo‘lgan preparatni retsept bo‘yicha sotishni taklif qildi

Tarkibida spirt bor tibbiy preparatlar, shu jumladan, “Valokordin” va “Boyarishnik” retseptlar bo‘yicha sotiladi. Bu haqda Rossiya hukumati raisining o‘rinbosari Aleksandr Xloponin bayonot berdi, deb xabar qiladi “RBK”.

Shuningdek, u tarkibida spirt bor preparatlar sotuvchi apparatlar yo‘q qilinishini aytib o‘tdi.

“Tibbiy preparat sifatida ishlatiladigan va ba’zilar ichadigan ‘Boyarishnik’ damlamasi ham dorixonada retsept bo‘yicha sotiladi. Hozirgiday avtomatlar orqali emas”, — tushuntirdi u.

Xloponinning fikricha, sotish miqdoriga ham cheklov o‘rnatish lozim.

Eslatib o‘tamiz, Rossiyaning Irkutsk shahrida “Boyarishnik”dan zaharlanib o‘lganlar soni 71 kishiga yetdi.