Futbol bo‘yicha O‘zbekiston Oliy Ligasida chempionlikni qo‘lga kiritgan jamoaga 2017-yilgi mavsumdan boshlab kubok topshiriladi. Bu haqda mamlakat Professional Futbol Ligasi rahbari Farhod Magomedov yangi mavsumga qur’a tashlash marosimi vaqtida aytib o‘tdi, deb yozdi “Championat.asia”.
2016-yil O‘zbekiston Kubogida zafar quchgan Toshkentning “Lokomotiv” klubiga yangi ko‘rinishdagi kubok topshirilgandi. Endilikda mamlakat chempioni ham kubokli bo‘ladi.
Farhod Magomedovning so‘zlariga ko‘ra, yangi kuboklar O‘FF prezidenti Mirabror Usmonovning yordami bilan olib kelingan:
“O‘FF prezidenti yordamida ikkita yangi kubok olib kelindi. Endi ular doimiy ravishda g‘oliblarga topshiriladi. Ikkala kubok ham qimmat metallardan yasalgan”, — deb ta’kidlagan Magomedov metalning qanday ekaniga ham, uning qaysi mamlakatdan kelib qolganiga ham oydinlik kiritmagan.
Farhod Magomedov mamlakat chempionligi va kubogini qo‘lga kiritgan jamoalarga pul mukofoti topshirilishi masalasiga va tabiiyki, topshirilsa uning qancha miqdorda bo‘lishiga oydinlik kiritmagan.
O‘zbekiston Oliy Ligasining 2016-yilgi mavsumida Toshkentning “Lokomotiv” futbol klubi o‘z tarixida ilk bor chempionlikni qo‘lga kiritgandi. Mamlakat kubogi ham aynan uning o‘ziga nasib qildi.
Izoh (0)