Buyuk Britaniya tashqi ishlar vazirining o‘rinbosari, parlament a’zosi ser Alan Dunkanning O‘zbekistonga tashrifi boshlandi. Bu haqda UzDaily xabar bermoqda.
Alan Dunkan Shavkat Mirziyoyev Prezident lavozimiga kirishgandan so‘ng O‘zbekistonga tashrif buyurgan birinchi xorijiy yuqori martabali mehmon bo‘ladi.
U o‘z tashrifi davomida O‘zbekiston Prezidenti Shavkat Mirziyoyev, tashqi ishlar vaziri Abdulaziz Kamilov, tashqi iqtisodiy aloqalar, investitsiyalar va savdo vaziri Elyor G‘aniyev, Oliy Majlis Senatining birinchi o‘rinbosari Sodiq Safoyev bilan uchrashishi ko‘zda tutilgan.
“O‘zbekistonga kelish va Prezident Mirziyoyevni saylovlardagi g‘alabasi bilan tabriklash imkoni tug‘ilganidan mamnunman. Prezident boshlagan islohotlar dasturini qo‘llab-quvvatlayman va u hamda hukumat bilan Buyuk Britaniya va O‘zbekiston o‘rtasidagi munosabatlarni mustahkamlash ustida ishlashdan umid qilaman. Bizning terrorchilikka qarshi kurash va mudofaa sohasidagi tig‘iz hamkorligimiz avvalgidek mintaqada xavfsizlikni ta’minlash uchun hayotiy muhim hisoblanadi. Prezidentning biznes muhitini yaxshilash va xususiy sektorni kengaytirish to‘g‘risidagi qarori Britaniya kompaniyalari mazkur katta va rivojlanayotgan bozorga e’tibor qaratishiga turtki berishiga ishonchim komil”, — deya ta’kidladi ser Alan Dunkan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)