Bill Geyts 1 mlrd dollar kapitalga ega sof texnologiyalar bilan shug‘ullanuvchi jamg‘arma yaratishda ishtirok etdi

Microsoft asoschilaridan biri Bill Geyts, Amazon rahbari Jeff Bezos, Sun Microsystems asoschisi Vinod Xosla, Alibaba asoschisi Jek Ma, venchur investori Jon Doer va yana 15 yirik texnologik investor Breakthrough Energy Ventures (BEV) jamg‘armasining yaratilganini e’lon qildi. Ushbu tuzilma yaqin 20 yil ichida sof texnologiyalar yaratishga kamida 1 milliard dollar yo‘naltiradi, deb xabar beradi 3DNews.

Direktorlar kengashiga kirgan jamg‘arma asoschilarining umumiy mablag‘i, Bloomberg va Forbes hisob-kitoblariga qaraganda, 170 milliard dollarni tashkil etadi.

Geyts ushbu jamg‘arma ishini boshlash niyatini o‘tgan yilgi Parij iqlim o‘zgarishi konferensiyasida (2015 Paris Climate Change Conference, COP21) ma’lum qilgan edi.

BEV Breakthrough Energy Coalition koalitsiyasining rasmiy investitsion venchur loyihasi hisoblanadi. Ushbu koalitsiya 10 mamlakat vakili bo‘lmish 25 yirik investorni qamrab oladi. Koalitsiya tuzilishi anonsi COP21 chog‘ida berilgan edi.

Tuzilmaning asosiy maqsadi ekologik toza, uglerodsiz texnologiyalar yaratishga ko‘mak berishdir.