Avvalroq e’lon qilinmagan tashrif bilan Iroqqa kelgan AQSh mudofaa vaziri Eshton Karter mamlakat bosh vaziri Haydar al-Obodiy bilan uchrashuv o‘tkazdi, deb yozadi “TASS”. Ular Mosulni ozod etish bo‘yicha operatsiyani va iroqlik kurdlar bilan hamkorlikni muhokama qildi.
“Ularning sermahsul suhbati asosan IShIDni tor-mor qilish bo‘yicha harbiy kampaniyaga bag‘ishlandi, vazir Karter Mosul uchun davom etayotgan janglarda Iroq xavfsizlik kuchlari harakatlarini qayd etdi. Ular Mosul operatsiyasi chog‘idagi navbatdagi qadamlarni, shu jumladan, Iroq hukumati va kurd hududi hukumati bilan yaqin aloqalarni davom ettirish zaruriyatini muhokama qildi”, — deyiladi muassasa xabarida.
Vakolati muddati kelasi yilning yanvarida tugaydigan Karter al-Obodiyga ikki yillik hamkorlikdagi faoliyat uchun minnatdorlik bildirdi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.