Yaponiya parlamentining yuqori palatasi Trans-Tinch okeani hamkorligiga qo‘shilish haqidagi bitim ratifikatsiyasi uchun ovoz berdi. Bu haqda “TASS” xabar bermoqda.
Avvalroq noyabr oxirida bitimni quyi palata ham ratifikatsiya qilgan edi. Natijada 9-dekabr, juma kuni ushbu hujjat to‘liq tasdiqlandi.
Yaponiya tomonidan bitimning ratifikatsiya qilinishi AQSh prezidentligiga saylangan Donald Trampning ushbu iqtisodiy alyansga salbiy munosabati tufayli uning kelajagi yuzasidan tashvishli vaziyatda bo‘lib o‘tdi. Tramp o‘z mamlakatining Trans-Tinch okeani hamkorligiga qo‘shilishiga yo‘l qo‘ymasligini bir necha marta ta’kidlagan.
AQShning amaldagi prezidenti Barak Obamaning barcha harakatlariga qaramasdan, Kongress mazkur hujjatni ratifikatsiya qilmadi.
Trans-Tinch okeani hamkorligi — Osiyo-Tinch okeani hududidagi 12 mamlakatning (Avstraliya, Bruney, Vyetnam, Kanada, Malayziya, Meksika, Yangi Zelandiya, Peru, Singapur, AQSh, Chili va Yaponiya) savdo alyansidir.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)