Ispaniya La Ligasining yevrokuboklarda o‘ynayotgan barcha futbol klubi navbatdagi bosqichga yo‘l oldi

Futbol bo‘yicha Yevropa Chempionlar Ligasida Ispaniyaning 4 ta, Yevropa Ligasida esa 3 ta jamoasi ishtirok etayotgandi. Ularning hammasi navbatdagi bosqichga yo‘llanma oldi.

Kuchli beshlik chempionatlarining qolgan ishtirokchilari bunday natija qayd eta olmagan. Italiyada “Inter” Yevropa Ligasida ham o‘zini o‘nglay olmadi. Angliyada “Tottenhem” Chempionlar Ligasi guruhida uchinchi bo‘lib qoldi. Odil Ahmedovning “Krasnodar” klubi Mario Balotelli to‘p suradigan Fransiyaning “Nitssa” klubini guruhda qoldirib ketdi. Germaniyadan esa “Borussiya Myonxengladbax”ni shunday taqdir qarshi oldi.

Ispaniyaning Yevropa Chempionlar Ligasida ishtirok etgan “Barselona” va “Atletiko” klublari guruhni 1-o‘rinda yakunladi. “Real Madrid” hamda “Sevilya”ga ikkinchi bo‘lish nasib qildi.

Yevropa Ligasida esa “Atletik”, “Vilyarreal”, “Selta” kabi klublar navbatdagi bosqichga yo‘l oldi.

UEFA musobaqalarga kvota ajratayotganda mamlakatlarning reyting jadvaliga e’tibor qiladi. Bu borada Ispaniya La Ligasi qatorasiga to‘rtinchi mavsumdirki yetakchilikni hech kimga bermay keladi.