5-dekabr kuni Moskva shahrida 874 ta yo‘l-transport hodisasi sodir etilib, ikki kishi hayotdan ko‘z yumdi. Bu haqda “Meduza” shahar YPX boshqarmasiga asoslanib xabar berdi.
Noxush holatlarga yog‘ayotgan kuchli qor, haydovchilarning oraliq masofa qoidalariga amal qilmagani va sirpanchiq trassalarda tezlikni meyoridan oshirgani sabab bo‘lgan.
Moskvada 6-dekabr kuni ham kuchli qor yog‘ishi aytib o‘tilgan bo‘lib, haydovchilarga o‘z avtomashinasida yo‘lga chiqmaslik tavsiya etilgan. Boisi bir sutka ichida qorning yerdagi qalinligi 22 santimetrga qadar yetib qolgan.
“TASS” nashrining qayd etishicha, 2 kishi hayotdan ko‘z yumganidan tashqari, yana 18 nafar yo‘lovchi turli darajadagi tan jarohatlar olgan. Haydovchilarning 9 nafari piyodalar uchun mo‘ljallangan yo‘lkalarga qadar chiqib ketgan.
2016—2017-yilgi qish mavsumi hisobidan kuchli qor ikkinchi bor katta baxtsiz hodisalarga sabab bo‘ldi. Shu yilning 11-noyabr kuni 880 ta yo‘l-transport hodisasi qayd etilgandi. Solishtirish uchun, 2015-yilning butun bir dekabrida Moskva shahrida 1015 ta yo‘l-transport hodisasi qayd etilgandi.
Izoh (0)