Pokistonning Karachi shahridagi mehmonxonada yuz bergan yong‘in oqibatida 11 kishi halok bo‘ldi
Pokistonning Karachi shahridagi (Sind viloyati) mehmonxonalardan birida 5-dekabr, dushanba kuni yong‘in yuzaga kelishi oqibatida kamida 11 kishi halok bo‘ldi, yana 30 kishi jabrlandi. Bu haqda Dawn gazetasi ma’lum qildi, deb yozadi “TASS”.
Hodisa Regent plaza mehmonxonasida erta tongda yuz berganligi ma’lum qilinmoqda. Yong‘in binoning oshxona qismidan boshlanib, tezda mehmonxonaning barcha olti qavatiga tarqalgan. Oqibatda xonalardagi ijarachilar bekilib qolgan.
Voqea joyiga zudlik bilan yetib kelgan uchta o‘t o‘chirish jamoasi yong‘inni uch soatdan keyin o‘chirishga muvaffaq bo‘ldi. Biroq qidiruv-qutqaruv operatsiyasi hali yakunlanmagan, chunki binoda evakuatsiya qilinmagan ijarachilar bor.
Yong‘inning yuzaga kelish sabablari hozircha aniqlanmagan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
