O‘zbekiston Liberal-demokratik partiyasidan O‘zbekiston Prezidentligiga nomzod Shavkat Mirziyoyev saylovda ovoz berdi

Tadbirkorlar va ishbilarmonlar harakati – O‘zbekiston Liberal-demokratik partiyasidan O‘zbekiston Respublikasi Prezidentligiga nomzod Shavkat Mirziyoyev ovoz berish uchun 4-dekabr kuni Toshkent shahri Mirzo-Ulug‘bek tumanidagi 132-saylov uchastkasiga tashrif buyurdi. Bu haqda “Daryo” muxbiri xabar berdi.

Shavkat Mirziyoyev saylov uchastkasiga oila a’zolari bilan birga tashrif buyurdi.

Ushbu saylov uchastkasida jami 2352 nafar saylovchi ro‘yxatga olingan. Ayni paytda bu yerda saylovchilar faol tarzda ovoz bermoqda.

Bugun, 4-dekabr kuni O‘zbekistonda mamlakat prezidentligiga saylovlar bo‘lib o‘tmoqda. O‘zbekiston Respublikasi Prezidentligiga “Milliy tiklanish” demokratik partiyasidan Sarvar Otamuratov, O‘zbekiston Liberal-demokratik partiyasidan Shavkat Mirziyoyev, Xalq demokratik partiyasidan Xatamjon Ketmonov va “Adolat” sotsial-demokratik partiyasidan Narimon Umarov o‘z nomzodini qo‘ygan.

Eslatib o‘tamiz, 24-noyabrda boshlanib, 2-dekabrga qadar o‘tkazilgan muddatidan oldin ovoz berishda 117 902 kishi qatnashdi. Davlat rahbari saylovida jami 20 milliondan ortiq kishi ishtirok etadi.