O‘zbekiston Prezidenti saylovida xalqaro kuzatuvchi sifatida ishtirok etayotgan Germaniyaning Silk Road Company madaniy-jamoatchilik kompaniyasi direktori Gerxard Gyunter Birkl o‘z taassurotlari bilan o‘rtoqlashdi. Bu haqda O‘zA xabar bermoqda.
“O‘zbekiston Prezidenti saylovi yuksak saviyada o‘tmoqda. Saylov uchastkalarida har bir fuqaroning konstitutsiyaviy huquqidan to‘liq foydalanishini ta’minlash, saylovni milliy qonunchilik va xalqaro demokratik prinsiplar asosida ochiq va oshkora ruhda o‘tkazish borasida barcha sharoit yaratilgan”, — deydi Gerxard Gyunter Birkl.
“Uchastkalarda ona va bola xonalari tashkil qilingani menda katta taassurot qoldirdi. Bu tajribani Germaniyada ham qo‘llash mumkin ekan. Bu qulaylik saylovchini o‘zi ma’qul bilgan nomzodga chalg‘imasdan, erkin ovoz berishini ta’minlaydi”, — dedi germaniyalik kuzatuvchi.
“O‘zbekistonning xalqaro nufuzi tobora yuksalmoqda. Yurtingizda turizm sohasi izchil rivojlanib, xorijlik sayyohlar oqimi ortayotgani buning yaqqol tasdig‘idir. O‘zbekistonga qilgan safarlarim sarhisobi hamda xalqingizning boy tarixi, buguni bilan Germaniya va butun Yevropani tanishtirish maqsadida maxsus galereya tashkil etganman. Unda buyuk Amir Temur haqida ham ma’lumotlar bor. Bu galgi safarimda yanada ko‘p ma’lumot yig‘ib, uni yanada boyitmoqchiman”, — deya qo‘shimcha qildi Gerxard Gyunter Birkl.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)