Jon Xopkins universiteti (AQSh) qoshidagi Markaziy Osiyo va Kavkaz instituti raisi Frederik Starr O‘zbekistonda 4-dekabr kuni bo‘lib o‘tadigan Prezident saylovi jarayonida ishtirok etish maqsadida tashrif buyurgan xalqaro kuzatuvchilar qatorida mamlakatda bo‘lib turibdi. Bu haqda “Gazeta.uz” xabar bermoqda.
Toshkentda bo‘lib o‘tgan, saylov o‘tkazishning konstitutsion-huquqiy asoslariga bag‘ishlangan konferensiya chog‘ida jurnalistlar bilan suhbat qilar ekan, Frederik Starr siyosiy partiyalar rivojini ko‘rish diqqatga sazovor ekanligini ta’kidlab o‘tdi. Ekspertning fikricha, partiyalar haqiqiy, tirik organlarga aylandi va ular amaliy qadamlar tashlamoqda.
“Bu yerda kuzatuvchi sifatida bo‘lishdan juda xursandman. O‘zbek xalqini saylovdan oldinoq ayrim yutuqlar bilan tabriklamoqchiman. Bir narsani tan olish muhimki, buning bari mamlakat yetakchisining vafotidan so‘ng, katta o‘zgarishlar paytida bo‘lib o‘tmoqda. Butun dunyoda ham o‘zgarishlar ba’zan xavfli bo‘lishi mumkin. Ammo bu yerda ular tinch va qonuniy o‘tmoqda. O‘ylaymanki, bu mamlakatning siyosiy va ijtimoiy rivojini ko‘rsatuvchi ulkan yutuqdir”, — dedi Starr.
Ekspert o‘zbekistonliklar psixologik nuqtai nazardan o‘zlarini fuqaro deb his etayotganini alohida qayd qildi.
“Mamlakatning Birinchi Prezident vafotidan keyingi hayoti yetuklikni hamda fuqarolik jamiyati mohiyatining chuqur anglanayotganini ko‘rsatadi”, — dedi u.
Izoh (0)