Xitoy kompaniyasi 145 mln dollarga “Titanik”ning aynan nusxasini qurmoqda
Xitoyning Wuchang Shipbuilding Industry Group kemasozlik kompaniyasi 1912-yilda shimoliy Atlantikada cho‘kib ketgan “Titanik” paroxodining nusxasini qurishni boshladi, deb yozadi “TASS”.
“Sinxua” agentligi xabariga ko‘ra, loyihaga kiritilgan investitsiyalar 1 milliard yuan (145 million dollar)ni tashkil qiladi.
Kemasozlik kompaniyasi bosh direktori o‘rinbosari Van Veylin ma’lum qilishicha, kema asl “Titanik”ning to‘liq nusxasiga aylanadi. Uning uzunligi 269 metr, eni esa 29 metrni tashkil etadi. Ammo u haqiqiysidan farqli tarzda birorta ham reysni amalga oshirmaydi, balki Sichuan provinsiyasidagi Dain uyezdida suv havzalaridan birida doimiy to‘xtab turadi. Loyiha mualliflari g‘oyasiga ko‘ra, yangi “Titanik” mintaqada sayyohlik attraksionlaridan biriga aylanishi kerak.
Ichki interyeri ham kemaning shohona tashqi qiyofasiga mos bo‘ladi: kemasozlar va dizaynerlar asl “Titanik”dagi har bitta detalni qaytadan yaratmoqchi.
