Ibrahimovich dubl qayd etgan va Shvaynshtayger o‘ynagan uchrashuvda “Yunayted”dan yirik g‘alaba, “Arsenal”da mag‘lubiyat

Futbol bo‘yicha Angliya Liga Kubogining yarim finaliga yo‘llanma olgan barcha jamoa nomiga oydinlik kiritildi.

Joze Mourinyo boshchilik qilayotgan “Manchester Yunayted” klubi Premyer-Liganing so‘nggi turida “Vest Hem”ni qabul qilib, 1:1 hisobida durang o‘ynagandi. Tomonlarning Liga Kubogidagi to‘qnashuvida “qizil iblislar” yirik g‘alabani qo‘lga kiritdi — 4:1.

Bellashuvda Zlatan Ibrahimovich va Antoni Marsyal ikki martadan muvaffaqiyat qozondi. Mourinyoning tashrifidan keyin zaxiraga “mixlangan” Bastian Shvaynshtayger 87-daqiqaga kelib maydonga tushdi. Shuningdek, Genrix Mxitaryan bellashuvni boshlang‘ich tarkibda o‘tkazdi. Shu kuni faqatgina Pol Pogba maydonda ko‘rinmadi.

Chorak finalning so‘nggi o‘yinida Londonning “Arsenal” klubi muvaffaqiyatsizlikka uchradi va turnirni tark etdi. O‘z maydonida “Sautgempton”ni qabul qilgan Venger jamoasi 0:2 hisobida yengildi. Qayd etish kerak, o‘yinda “to‘pchilar”ning asosiy futbolchilari ishtirok etmadi.

Bir kun oldin — 29-noyabr kuni chorak finalning yana ikki o‘yini bo‘lib o‘tgandi.

Angliya Liga Kubogining yarim finalida “Yunayted” “Xall Siti”ga qarshi kurash olib borsa, “Liverpul” va “Sautgempton” klublari o‘zaro to‘qnash keladi. Bellashuvlar 9—23-yanvar sanalariga tayin qilingan.

Angliya Liga Kubogi ¼ final bellashuvlari 30-noyabr, chorshanba

“Manchester Yunayted” — “Vest Hem” 4:1

“Arsenal” — “Sautgempton” 0:2