Erdo‘g‘on: “Frot qalqoni” operatsiyasi faqat terrorchilarga qarshi qaratilgan

Turkiya qurolli kuchlarining Suriyadagi “Frot qalqoni” harbiy operatsiyasi faqat terrorchi guruhlarni yo‘q qilishga yo‘naltirilgan va boshqa maqsadlarga ega emas. Bu haqda Turkiya prezidenti Rajab Toyyib Erdo‘g‘on Anqarada mintaqaviy ma’muriyatlar vakillari bilan o‘tkazilgan uchrashuv chog‘ida ma’lum qildi, deb xabar beradi “TASS”.

“‘Frot qalqoni’ operatsiyasining nishoni biror bir davlat yoki odam emas, u faqat terrorchi guruhlarga qarshi yo‘naltirilgan. Hech kim bundan shubhalanmasin va boshqa ma’no qidirmasin. Turkiya yolg‘iz qolsa ham terrorga qarshi kurashni davom ettiradi”, — dedi Erdo‘g‘on.

Erdo‘g‘on Turkiya o‘zining bu maqsadi yo‘lida G‘arb davlatlarining qarshiligiga uchrayotganini qayd qilib o‘tdi.