Toshkentda Captiva bilan to‘qnashgan Matiz portlab ketdi, Captiva yana Epica’ga ham borib urildi (foto)

Toshkentning Yunusobod tumanida 29-noyabr kuni oqshomda Matiz rusumli avtomobil yonib ketdi. Bu haqda UZ24 xabar bermoqda.

Hodisa mahalliy vaqt bilan soat 23:00 dan o‘tganda, Amir Temur shoh ko‘chasining “Qozog‘iston” kinoteatri qarshisidagi qismida yuz bergan.

“Qalampir.uz”ning yozishicha, Matiz portlab ketgan — portlash unga Captiva avtomobili katta tezlikda kelib urilishi oqibatida yuz bergan.

Captiva avtomobili Matiz bilan to‘qnashuvdan so‘ng ham harakatdan to‘xtamay, yo‘l yoqasida turgan Epica’ga borib urilgan va uni piyodalar yo‘lakchasiga chiqarib yuborgan.

Voqea yuz bergan joyda transport harakati to‘xtatilgan, Matiz’dagi olov o‘t o‘chiruvchilar tomonidan o‘chirilgan.

Avtomobil nima sababdan yonib ketganiga aniqlik kiritilmagan. Jabrlanganlar haqida ma’lumot yo‘q.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.