AQShda o‘tkazilgan tekshiruv Deyr-az-Zor atroflarida Suriya qo‘shinlarining koalitsiya aviatsiyasi tomonidan bombardimon qilinishi “qasddan qilinmagan xatolik” natijasida yuz bergan, degan xulosaga keldi. Bunday bayonot bilan Amerika brigada generali Richard Kou chiqish qildi, aynan u hodisa bilan bog‘liq vaziyatni tekshirish uchun mas’ul bo‘lgan, deb yozadi “RBK”.
Uning so‘zlariga ko‘ra, koalitsiya Suriya qo‘shinlarini IShID guruhi jangarilari deb o‘ylagan, chunki ular qurollangan bo‘lgan, ammo odatiy harbiy libosda bo‘lmagan. “Ushbu nishonlarga zarba berish qarori qurolli nizo qonunlariga muvofiq qabul qilingan”, — dedi Kou.
Tekshiruv natijalariga ko‘ra, razvedka tahlilchilari “qarorlar qabul qiladigan kishilarga boshqacha ma’lumotlarni aniqlab taqdim eta olmagan”, bu esa xatolikka olib kelgan.
Suriya qurolli kuchlari qo‘mondonligi vakillari AQSh rahbarligidagi koalitsiya samolyotlari tomonidan berilgan zarbalar haqida 17-sentabrda ma’lum qilgan edi. Rossiya mudofaa vazirligi ma’lumotlariga ko‘ra, to‘rtta aviazarba natijasida 62 nafar harbiy xizmatchi halok bo‘lgan, 100 ga yaqini yaralangan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)