“Adolat” sotsial-demokratik partiyasidan O‘zbekiston Respublikasi Prezidentligiga nomzod Narimon Umarov o‘zining respublika hududlari bo‘ylab olib borgan saylovoldi tashviqoti doirasidagi oxirgi uchrashuvini 28-noyabr kuni Toshkent viloyati saylovchilari bilan o‘tkazdi. Bu haqda “Daryo”ga partiya matbuot xizmati ma’lum qildi.
Viloyat hokimiyati majlislar zalida bevosita onlayn videokonferensiya muloqot tarzida o‘tkazilgan tadbirda davlat va jamoat tashkilotlari vakillari, deputatlar, fuqarolarning o‘zini o‘zi boshqarish organlari faollari, yoshlar, partiya a’zolari hamda jurnalistlardan iborat jami 4500 nafarga yaqin saylovchi ishtirok etdi.
Uchrashuvni “Adolat” SDP Toshkent viloyat kengashi raisi R. Talipov olib bordi. Narimon Umarovning ishonchli vakili “Adolat” SDP Parkent tuman kengashi raisi M. Berdiqulova saylovchilarni Prezidentlikka nomzodning tarjimai holi va mehnat faoliyatiga doir ma’lumotlar bilan yaqindan tanishtirdi.
O‘z ma’ruzasida N.Umarov Toshkent viloyati istiqlol yillarida tubdan yangilanish va yuksalish sari yuz tutib, mamlakatning har jihatdan yirik va salohiyatli subyektlaridan biriga aylanganini e’tirof etdi. Jumladan, nomzod viloyatning iqtisodiy salohiyatini raqamlarda ifodalar ekan, bugungi kunda ishlab chiqariladigan sanoat mahsulotlarining qariyb 15 foizi, qishloq xo‘jaligi mahsulotlarining 12 foizdan ziyodi, iqtisodiyotga jalb etilayotgan investitsiyalarning taxminan 10 foizi, YaIMning esa 9,7 foizi ayni shu viloyat hissasiga to‘g‘ri kelishini qayd etdi.
Narimon Umarov saylovchilarni o‘z saylovoldi dasturining asosiy yo‘nalishlari bilan tanishtirar ekan, unda ilgari surilgan g‘oyalar “Adolat” sotsial-demokratik partiyasining ijtimoiy yo‘naltirilgan bozor iqtisodiyotiga asoslangan huquqiy-demokratik davlat, ma’naviy va axloqiy yetuk adolatli fuqarolik jamiyati barpo etish borasidagi dasturiy maqsad va vazifalariga asoslanishini qayd etdi. Dasturda belgilangan vazifalar hayotiyligi, bugungi zamon talab va ehtiyojlaridan kelib chiqqanligi, hududlardagi mavjud ijtimoiy-iqtisodiy masalalarni o‘zida aks ettirgani hamda aniq mexanizmlarga asoslangani bilan saylovchilarda katta qiziqish uyg‘otdi.
Jumladan, Narimon Umarov poytaxt viloyati sifatida Toshkent mineral xomashyo manbalariga boyligi, qulay transport-logistika tizimiga va infrastrukturaga egaligi, mehnat resurslarining ko‘pligi hamda ishbilarmonlik muhiti yaratilgani bilan xorijiy investorlar uchun jozibador hudud sanalishiga qaramay, bugungi kunda o‘zlashtirilayotgan xorijiy sarmoyalar hajmi viloyatning iqtisodiy salohiyati uchun yetarli emasligini ta’kidladi. Bu boradagi ishlarni tizimli ravishda rivojlantirish barobarida uning ayrim jihatlariga alohida e’tibor qaratish zarurligini bildirdi.
Xususan, Prezidentlikka nomzod investitsiya takliflarini chuqur o‘rganish va investorlarning ishlab chiqarishni modernizatsiyalash, yangi texnika va yuksak texnologiyalarni kiritish, raqobatdosh, yuqori qo‘shimcha qiymatga ega mahsulotlar ishlab chiqarilishini ta’minlash bo‘yicha majburiyatlarini qat’iy nazorat ostiga olish asnosida korxona va muassasalarni bosqichma-bosqich xususiylashtirish siyosatini davom ettirish va bu orqali aralash iqtisodiyot doirasida davlat mulkini himoya qilish, strategik muhim obyektlarni ularning ijtimoiy foydaliligidan kelib chiqib davlat tasarrufida qoldirish prinsipial ahamiyatga ega ekanligiga saylovchilar diqqatini qaratdi.
Narimon Umarov saylovchilarning savollariga javob qaytarib, fikr va takliflarini bildirgan yig‘ilish ishtirokchilariga minnatdorlik izhor etdi.
Tadbirda Oliy Majlis Qonunchilik palatasi deputati L. Koshelapova, Toshkent viloyati ko‘p tarmoqli markaziy shifoxona bosh shifokori B. Qosimov, xalq deputatlari Toshkent viloyat Kengashi deputati K. Hamidova, “To‘ytepa agro maks” mas’uliyati cheklangan jamiyati rahbari U. Shoumarov, “O‘zbekiston temir yo‘llari” aksiyadorlik jamiyati kapital qurilish direksiyasi rejalashtirish bo‘limi yetakchi mutaxassisi Ye. Ablayeva va boshqalar nomzodning saylovoldi dasturi haqida o‘z fikr-mulohazalarini bildirdi.