O‘zbekiston Bosh vaziri birinchi o‘rinbosari va Moliya vaziri Rustam Azimov ishonchli, xavfsiz va samarali transport kommunikatsiyalarini rivojlantirish bo‘yicha harakatlarni xalqaro ko‘lamda birlashtirish kerakligini aytdi, deb yozadi UzDaily.
Ashxobodda bo‘lib o‘tgan BMTning barqaror transport bo‘yicha Birinchi Global anjumanida nutq so‘zlar ekan, Rustam Azimov ayni paytda transport kommunikatsiyalaridagi xavfsizlikni ta’minlash masalasi alohida dolzarblikka egaligini ta’kidladi.
“Afsuski, biz texnogen omillar natijasida yuz berayotgan transport halokatlari soni va ko‘lami oshayotganiga guvoh bo‘lmoqdamiz. Yildan-yilga avvalambor, terrorchilik xavfi bilan bog‘liq bo‘lgan yangi-yangi risklar va chaqiriqlar paydo bo‘lmoqda”, — dedi Azimov.
“Bunday sharoitlarda transportdagi har qanday xavflar oldini olishga, transport kommunikatsiyalari va infratuzilmasining xavfsiz va barqaror ishini ta’minlashga qaratilgan xalqaro hamkorlikni yuzaga keltirish g‘oyatda muhim deb hisoblaymiz”, — deya qayd etdi u.
O‘zbekiston delegatsiyasi rahbari ushbu forum natijalari ushbu yo‘nalishlardagi hamkorlikni yo‘lga qo‘yish imkonini berishiga ishonch bildirdi.
Izoh (0)