Qozog‘iston prezidenti Nursulton Nazarboyev ayni paytda o‘zining 2020-yilgi prezident saylovlaridagi ishtiroki haqida gapirishni istamaydi, ammo qonunchilikka ko‘ra, u yangi muddatga o‘z nomzodini qo‘ya oladi. Bunday nuqtai nazarini u Bloomberg agentligiga bergan intervyusida ma’lum qildi, deb yozadi “TASS”.
“Agar qonunlarimiz va konstitutsiyamiz haqida gapiradigan bo‘lsam, ular menga bundan keyin ham o‘z nomzodimni qo‘yish imkonini beradi”, — dedi Nazarboyev. “Biroq 2020-yilda nima bo‘lishini men sizga aytmayman, chunki bu ko‘p omillarga bog‘liq”, — deya ta’kidladi u.
Shu bilan birga, prezident fikricha, davlat arbobi ishida uning lavozimdagi faoliyati davomiyligi emas, uning samaradorligi muhimdir. “O‘z faoliyating bilan xalqingga va yurtingga foyda keltirayapsanmi, yo‘qmi — asosiy masala shunda deb o‘ylayman”, — deya aniqlik kiritdi u.
Avvalroq Nursulton Nazarboyev mamlakat hokimiyatini o‘z farzandlariga meros qilib qoldirmoqchi emasligini aytgan edi.
Izoh (0)