Kolumbiya prezidenti Xuan Manuel Santos va Kolumbiya inqilobiy qurolli kuchlari guruhi yetakchisi Rodrigo Londonyo Echeverri 24-noyabr, payshanba kuni yangi tinchlik bitimini imzoladi. Bu haqda AFP ma’lum qildi, deb yozadi “TASS”.
26-sentabr kuni Kolumbiya hukumati va Kolumbiya inqilobiy qurolli kuchlari Kartaxena shahrida yarim asr davom etgan ichki qurolli mojaroni to‘xtatish va barqaror tinchlik o‘rnatish haqidagi kelishuvni imzolagan edi. Biroq 2-oktabr kuni Kolumbiyada tinchlik bitimi yuzasidan bo‘lib o‘tgan referendumda juda kam farq bilan mazkur hujjatga qarshi bo‘lganlar g‘olib bo‘ldi.
Umberto de la Kalye boshchiligidagi hukumat delegatsiyasi muxolifatning hujjat matniga o‘zgartirish kiritish haqidagi barcha takliflarini to‘plab, Gavanaga yo‘l oldi. U yerda 13-noyabr kuni Inqilobiy qurolli kuchlar bilan yangi kelishuv imzolandi.
Kolumbiya hukumati va Inqilobiy qurolli kuchlari o‘rtasidagi qurolli mojaro 1960-yillarda boshlangan edi. Ushbu vaqt davomida 200 mingdan ortiq odam uning qurboniga aylandi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)