Rossiyada joriy yilda birinchi bor parranda grippi qayd etildi. Bu haqda “Interfaks” xabar bermoqda.
Rossiya veterinar va fitosanitar nazorat federal xizmati rasmiy vakili Aleksey Alekseyenkoga ko‘ra, kasallik Qalmig‘istondagi shaxsiy xo‘jaliklarda aniqlangan.
“Hozirda vaziyat o‘rganilmoqda. H5N8 grippi ekanligi taxmin qilinmoqda, biroq unga o‘xshash boshqa shtammlar ham bo‘lishi mumkin. Kasallikni chetdan uchib kelgan qushlar keltirgani ehtimoldan xoli emas”, — deya ta’kidladi vakil.
Shu bilan birga, Alekseyenko mamlakatda mazkur kasallik tarqalishi oldini olish va profilaktikasi bo‘yicha qat’iy choralar tizimi mavjudligini ma’lum qildi.
“Barcha idoralar kasallik yuzaga kelganida qanday harakat qilishini aniq biladi. Asosiysi, bizda qisqa muddatda ushbu virusning turli shtammlariga qarshi vaksina yaratish imkoniyati bor, parranda fabrikalarida biologik himoya tizimi ishga tushirilgan”, — deya eslatib o‘tdi Alekseyenko.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)