AQSh prezidenti Barak Obama 23-noyabr, chorshanba kuni davlat rahbari sifatida so‘nggi marta Shukronalik kuni arafasida kurkani afv etish milliy an’anasini bajardi, deb yozadi “RIA Novosti”.
Oq uyning Atirgullar bog‘ida bir necha o‘n kishi ishtirokidagi marosim o‘n daqiqadan ko‘p davom etmadi.
Qisqa nutqi chog‘ida Obama, xususan, “avlodlar davomida Amerika prezidentlari Shukronalik kunini e’lon qilish va hayotda ikkinchi imkoniyatni qo‘lga kiritishga umid qilayotganlarni afv etish kabi ikkita an’anaga rioya qilib kelgani”ni eslatdi.
“Shu haftada biz unisini ham, bunisini ham bajo keltirdik”, — dedi davlat rahbari mayda jinoyatlar uchun sudlangan ko‘p sonli mahbuslar afv etilganini nazarda tutib.
Prezident nutqidan so‘ng Tot laqabli kurkani maxsus tayyorlangan podiumga qo‘yishdi, u yerda Obama unga “ijozat qasami”ni o‘qidi, Shuningdek, marosimda ikkinchi kurka — Teytor ham bor edi, u Tot “o‘z vazifalarini bajarishdan bosh tortgan taqdirda, uning o‘rnini bosishi” ko‘zda tutilgan edi.
Marosimdan so‘ng ular Virginiya shtatining Texnologiya universitetiga yuborildi, u yerda kurkalarni veterinarlar va talabalar parvarish qiladi.
Izoh (0)