Yashillar partiyasidan AQSh prezidentligiga nomzod Jill Stayn Viskonsin, Michigan va Pensilvaniya shtatlarida ovozlarning qayta sanalishiga erishmoqchi ekanligini e’lon qildi. Sud xarajatlari uchun talab qilinadigan 2 million dollar bir necha soatda to‘plandi, deb xabar beradi TJournal.
Kampaniyaning kommunikatsiyalar bo‘yicha direktori Deyv Kobb tashabbus yuzasidan mablag‘ to‘plash boshlanishini Facebook’dagi to‘g‘ridan-to‘g‘ri translyatsiyada 23-noyabr kuni ertalab e’lon qilgan edi. O‘sha kunning kechki soatlariga qadar 2,5 million dollardan ko‘proq mablag‘ to‘plandi.
Faollar advokatlar va kuzatuvchilarga ketadigan xarajatni qoplash uchun yana shuncha pul to‘plashni rejalashtirmoqda.
Bir qancha ekspertlar bir-biridan mustaqil ravishda Michigan, Pensilvaniya va Viskonsin shtatidagi ovozlarda “statistik anomaliyalar” kuzatib, shu munosabat bilan tashvishdaligini bildirgan edi. Nomzodning shtabi shunga asoslangan holda ovozlarning qayta sanalishiga erishmoqchi.
Yashillar bu bilan Hillari Klintonga yordam berishni rejalashtirmayotganini alohida qayd qilib o‘tdi.
Ko‘rsatilgan shtatlarda Tramp kichik ustunlik bilan g‘alaba qozongan: Viskonsinda u raqibidan 0,7 foizga, Pensilvaniyada 1,2 foizga, Michiganda esa 0,3 foizga ko‘proq ovoz to‘plagan.
Izoh (0)