Amerikalik qo‘shiqchi Uitni Xyustonning o‘tgan yili vafot etgan qizi — Bobbi Kristina Braunning yigiti bo‘lgan Nikolas Gordon qizning o‘limiga ehtimoliy bog‘liqligi haqidagi ish bo‘yicha 36 million dollar to‘laydi, deb yozadi “TASS”.
Bunday qarorni 17-noyabr, payshanba kuni Jorjiya shtatining Fulton okrugi sudyasi Jekson Bedford chiqardi.
Xonandalar Uitni Xyuston va Bobbi Braunning yagona farzandi, 22-yoshli Bobbi Kristina Braun olti oy sun’iy komada yotib, 2015-yil 26-iyul kuni olamdan o‘tdi. Bobbi Kristina Nik Gordon uni suv to‘ldirilgan vannada hushsiz topganidan beri shunday holatda bo‘lgan.
Dastlabki sud-tibbiyot tekshiruvi o‘lim sabablarini aniqlay olmadi. Qizning tanasida shikastlanish alomatlari topilmagan, unda hech qanday jiddiy kasalliklar ham bo‘lmagan.
Shu bilan birga, Bobbi Kristina Braunning vasiysi ushbu o‘limda Nik Gordonni aybladi: u Fulton okrugi oliy sudiga taqdim etgan arizada qiz komaga tushgan kun Gordon bilan janjallashgani ta’kidlanadi.
Braunning qarindoshlari Gordonni qizning o‘limiga aloqadorlikda ayblab, u qizga narkotiklar berganligini da’vo qildi hamda undan 50 million dollar tovon puli talab qildi. Gordon ushbu ish bo‘yicha hech qaysi sud majlisiga kelmadi, o‘z advokatini ham yubormadi.
Sudya Bedford yigitni sudga nisbatan hurmatsizlikda aybladi va Gordon avtomatik tarzda sudda yutqazdi.
Izoh (0)