Urganch shahridagi “Xorazm Ravon trans” korxonasining yengil taksi haydovchilari bayram kunlari shahar ichi yo‘nalishlarida homilador ayollar va nogironlarni manziliga bepul yetkazmoqda. Bu haqda O‘zbekiston avtomobil va daryo transporti agentligi axborot xizmati xabar bermoqda.
“Bu tashabbus korxona rahbariyati va haydovchilarning o‘zlaridan chiqqan. Yil boshidan buyon har bayramda korxonaga qarashli yo‘nalishsiz taksi avtomobillari shahar hududida nogironlar va homilador ayollarga tekinga xizmat ko‘rsatmoqda”, – deyiladi xabarda.
“Xorazm Ravon trans” rahbariyati endilikda tug‘uruqxonadan “yangi mehmon” bilan chiqqan yosh onalarni uylariga bepul yetkazib qo‘yishni tashkil etish niyatida ekani ta’kidlandi. “Har kim qurbi yetgancha savob ish qilganiga nima yetsin! Odamlarga yaxshilik qilsangiz, muhtojlarga yordam qo‘lini cho‘zsangiz, o‘zingiz ham ruhiy halovatga erishasiz. Shunday ekan, boshlagan xayrli ishlarimizni aslo to‘xtatib qo‘ymaymiz”, – dedi korxona rahbari Adilbek O‘razov.
“Xorazm Ravon trans” ko‘p yillardan buyon shaharda yo‘lovchi tashish faoliyati bilan shug‘ullanib kelmoqda. Hozirgi kunda korxona tasarrufida 26 ta yengil avtotransport vositasi mavjud.
Izoh (0)