Rio—2016 Olimpiadasida ishtirok etgan o‘zbekistonlik sportchilardan 3 nafari oila qurib ulgurdi. Bu haqda “Daryo”ning Milliy Olimpiya Qo‘mitasidagi manbasi aytib o‘tdi.
Yunon-rum kurashining 59 kilogrammgacha bo‘lgan sportchilar o‘rtasidagi bellashuvlarida bronza medalini qo‘lga kiritgan Elmurod Tasmurodov o‘z jufti bilan oila qurdi.
Shuningdek, dzyudochi Mirali Sharipov ham o‘z baxtini topib ulgurgan. Mazkur sportchi Rio—2016 dagi ilk jangidayoq mag‘lub bo‘lib, Olimpiada bilan xayrlashgandi.
Festivalning suzish musobaqalarida O‘zbekiston sharafini himoya qilgan Ra’noxon Omonovaning oilali bo‘lgani haqida “Olamsport”dagi suratdan ham bilish mumkin. U 200 metrga suzish bellashuvlarida marraga sakkizinchi bo‘lib yetib kelgandi.
11-dekabr kuni esa o‘z vazn toifasida Rio—2016 Olimpiadasining bronza medalini qo‘lga kiritgan bokschi Rustam To‘laganov ham oila quradi. U 91 kilogrammgacha bo‘lgan sportchilar o‘rtasidagi musobaqada o‘z omadini sinab ko‘rgandi.
Rio—2016 yo‘llanmasini qo‘lga kiritganiga qaramay, terma jamoa tarkibidan tushib qolgan va Braziliyaga bora olmagan dzyudochi Sharofiddin Lutfullayev ham yangi hayot boshlagan.
Ma’lumot uchun, Rio—2016 Olimpiadasida bronza medalini qo‘lga kiritgan sportchilarning har biriga 75 ming AQSh dollari miqdorida mukofot puli berilgandi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.