Marokashning shu nomli mashhur kurorti yaqin ikki hafta ichida jahon matbuoti diqqat markazida bo‘ladi. 7–18-noyabr kunlari qirollikning “qizil-sarg‘ish” shahri BMTning iqlim o‘zgarishi masalalari bo‘yicha Butunjahon konferensiyasini (COP-22) qabul qiladi, deb xabar beradi “TASS”.
Kurort forumiga 20 mingga yaqin delegat yetib keladi, ular orasida davlatlar va hukumatlar rahbarlari, vazirlar, xalqaro tashkilotlar rahbarlari, ekologik idoralar va energetik kompaniyalari vakillari, monitoring agentliklari xodimlari, nufuzli ekspertlar va jurnalistlar bo‘ladi.
Shu munosabat bilan Marokashda jiddiy tayyorgarliklar o‘tmoqda. Shaharliklarning e’tirof etishicha, oxirgi bir necha oy mobaynida olib borilgan ishlar natijasida kurort va madaniy markaz bo‘lmish Marokash sezilarli darajada o‘zgarib ketdi. Hukumat shahar delegatlarlarda unutilmas taassurot qoldirishi uchun qo‘lidan kelgan barcha ishlarni amalga oshirmoqda. Shu bilan shahar dunyodagi eng mashhur turistik yo‘nalishlardan biri sifatidagi o‘rnini yana bir tasdiqlashi kutilmoqda.
Forum boshlanishidan bir necha kun oldin Marokash–Menara xalqaro aeroportining yangi terminali ochildi. Mehmonlar aeroportdan chiqishi bilan gullab-yashnayotgan toza-ozoda ko‘chalarni hamda COP-22 emblemalari aks etgan bannerlarga ko‘zi tushadi. Bundan tashqari, asosiy magistrallar — Muhammad VI va Hasan II shohko‘chalari bo‘ylab eng mashhur dekoratorlar ijrosida yorqin gul kompozitsiyalari yaratildi. Shu paytning o‘zida shahar hokimiyati Agdal va Menara bog‘ hududlarini obodonlashtirdi.
Turizm vazirligi xodimlari forum ochilishi arafasida shahardagi yuzlab mehmonxonalarni tekshirib, ularning eng ilg‘or talablarga javob berishi yuzasidan xulosalar chiqardi.
“Marokash BMT konferensiyasi ishtirokchilari va mehmonlarni kutib olishning yuksak darajasini ko‘rsatishi lozim, negaki bu shahar imijiga to‘g‘ridan-to‘g‘ri ta’sir ko‘rsatadi”, — deyiladi turizm vazirligi bayonotida.