31-oktabr kuni O‘zbekistonning Jidda shahridagi (Saudiya Arabistoni) diplomatik vakolatxonasi tomonidan 4-dekabr kuni o‘tkaziladigan O‘zbekiston Prezidenti sayloviga bag‘ishlangan brifing tashkil etildi. Bu haqda “Daryo”ga TIV matbuot xizmati xabar berdi.
Tadbirda xalqaro tashkilotlar, shu jumladan, Islom hamkorlik tashkiloti, Islom taraqqiyot banki, IINA xalqaro axborot agentligi vakillari, Jiddadagi xorij davlatlari diplomatik vakolatxonalari rahbarlari, Yaqin Sharq strategik va huquqiy tadqiqotlar markazi ekspertlari, shuningdek, mahalliy OAV xodimlari ishtirok etdi.Brifing chog‘ida ishtirokchilar O‘zbekiston Prezident saylovini o‘tkazishga ko‘rilayotgan tayyorgarlik, milliy saylov qonunchiligi, O‘zbekistondagi saylovlarning ochiqligi va shaffofligini ta’minlash bo‘yicha huquq amaliyoti, shuningdek, saylovda ishtirok etayotgan partiyalar yuzasidan batafsil ma’lumotga ega bo‘ldi.
Tadbirning bir necha qatnashchisi O‘zbekistonda o‘tishi kutilayotgan Prezident saylovi haqida o‘z fikrini bildirdi.
Habib Ka’bachi, IHT Departamentining siyosiy masalalar bo‘yicha direktori:
“O‘zbekistonda xalqaro standartlarga to‘la javob beruvchi milliy saylov tizimi shakllantirilgan, masalan, ko‘pchilik mamlakatlardan farqli ravishda, O‘zbekistonda Markaziy saylov komissiyasi doimiy ishlaydigan konstitutsion organ hisoblanadi, bu esa saylov jarayonini demokratik prinsiplar asosida tashkil etishga ko‘mak beradi.
Ishonchim komilki, yaqinlashayotgan O‘zbekiston Prezidenti saylovi ko‘plab chet ellik kuzatuvchilar ishtirokida, ochiqlik va oshkoralik ruhida o‘tadi”.
Faysal as-Sa’diy, “ash-Sharq al-Avsat” jurnalisti:
“Bugungi brifing menga O‘zbekiston saylov tizimi va qonunchiligi, Prezidentlikka ko‘rsatilgan nomzodlar, shakllantirilgan saylov okruglari va uchastkalari, chet el davlatlari va xalqaro tashkilotlardan taklif etilgan kuzatuvchilar, shuningdek, respublika Markaziy saylov komissiyasi faoliyati haqida ko‘p foydali axborotga ega bo‘lish imkoniyatini berdi.
O‘ylaymanki, yaqinlashayotgan O‘zbekiston Prezidenti saylovi yakunlari mamlakatning ijtimoiy-siyosiy va sotsial-iqtisodiy rivojlanishiga xizmat qiladi”.
Nagi Jabborov, IHT Departamentining iqtisodiy masalalar bo‘yicha xodimi:
“2015-yilgi Prezident saylovida xalqaro kuzatuvchi sifatida ishtirok etib, O‘zbekistonda saylov tizimi qay darajada batartib ishlashiga guvoh bo‘ldim. O‘zbekiston saylovchilari ovoz berishda faol ishtirok etdi va o‘z konstitutsion huquqlaridan samarali foydalandi.
O‘zbekiston hukumati va xalqiga Prezident saylovini muvaffaqiyatli o‘tkazishni tilayman. Ishonchim komilki, ovoz berish xalqaro standartlarga hamda milliy qonunchilikka to‘la muvofiq ravishda o‘tadi”.
Izoh (0)