Shvetsiya rasmiylari sobiq Ittifoqda g‘oyib bo‘lganidan so‘ng oradan 71 yil o‘tib Raul Vallenberg o‘limini rasman tan oldi. Mamlakat fuqarolari tug‘ilishi va o‘limini qayd etadigan qirollik soliq xizmati diplomat 1952-yil, 31-iyulda hayotdan ko‘z yumganini ma’lum qildi. Bu haqda “RBK” xabar bermoqda.
Raul Vallenberg 1944-yilda Shvetsiyaning Budapeshtdagi vakolatxonasi birinchi kotibi etib tayinlangan va diplomatlik maqomidan foydalanib, o‘n minglab venger yahudiylarini qirg‘indan saqlab qolgandi. 1945-yili Qizil armiya Budapeshtni egallaganidan so‘ng hibsga olindi va Moskvaga jo‘natildi, Lubyanka va Lefortovo qamoqxonalarida saqlandi. 1957-yili sho‘ro rasmiylari Vallenberg 1947-yil 17-iyulda qamoqxonada yurak xurujidan vafot etganini bildirdi.
Elchi o‘limi tafsilotlarini o‘rganish 71 yil davom etdi. Bu vaqt mobaynida bir necha ekspertizalar tashkil etildi. Ularning oxirgilaridan biri, 1991-yilda ish boshlagan Rossiya—Shvetsiya komissiyasi 10 yil davomida ishlagandi.
Izoh (0)