Janubiy Koreyadagi shov-shuvli korrupsion mojaroning asosiy ishtirokchisi, Janubiy Koreya prezidenti Pak Kin Xening dugonasi Chxve Sun Sil o‘z harakatlari uchun mamlakat aholisidan uzr so‘radi. Bu haqda “TASS” xabar bermoqda.
“Juda ham afsusdaman. Kechirib bo‘lmas ish qildim”, — dedi Chxve Sun Sil Seul prokuraturasidagi so‘roqdan chiqqanidan so‘ng.
Chxve Sun Sil o‘z mavqeidan foydalangan holda yirik kompaniyalarni unga aloqador ikki jamg‘armaga ko‘p millionli ehsonlar qilishga majburlaganlikda ayblanmoqda. Ayrimlar, o‘z navbatida, Pak Kin Xeni dugonasining bu ishlariga yo‘l qo‘yib berganlikda gumon qilmoqda.
Mazkur mojaro doirasida Janubiy Koreya prezidenti 25-oktabr kuni uzr so‘radi va saylov kampaniyasi chog‘ida Chxve Sun Sil unga ko‘p bora yordam berganini, kampaniyani qanday olib borish bo‘yicha maslahatlar bergani, matnlar yozish va jamoatchilik bilan aloqalar ishiga qo‘shilganini aytib o‘tdi.
Bundan tashqari, u Pak Kin Xe ma’muriyatiga Chxve Sun Sil tomonidan tomonidan tayinlangani taxmin qilingan bir qator amaldorlarni lavozimidan ozod qildi. Shunga qaramay, aholi orasida prezidentning nufuzi rekord darajada past — 14 foizga tushib ketgani aytilmoqda.
Xususan, shanba kuni Seulda 35 ming kishi Pak Kin Xe iste’fosini talab qilib, ko‘chalarga chiqdi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)