Rossiya BMTning Inson huquqlari bo‘yicha kengashiga qayta saylana olmadi
Rossiya BMTning Inson huquqlari bo‘yicha kengashiga qayta saylana olmadi va joriy yilning oxirida o‘z vakolatlarining muddati tugashi bilan uni tark etadi, deb yozadi “TASS”.
Bosh Assambleyada bo‘lib o‘tgan ovoz berish jarayonida Rossiya Federatsiyasi nomzodiga butunjahon tashkilotining 112 ta mamlakati ovoz berdi. Uning Sharqiy Yevropa guruhidagi raqiblari Vengriya va Xorvatiya esa tegishli tarzda 144 va 114 ta ovoz oldi.
Inson huquqlari kengashiga jami 14 ta a’zo saylanib, ularning vakolati 1-yanvardan boshlanadi. Kengashga Afrika guruhidan Misr, Ruanda, Tunis va JAR; Osiyo-Tinch okeani hududidan — Iroq, Xitoy, Saudiya Arabistoni va Yaponiya; Lotin Amerikasi guruhidan Braziliya va Kuba; G‘arbiy Yevropa va boshqa mamlakatlardan Buyuk Britaniya va AQSh o‘tdi.
Ulardan Xitoy, Kuba, Saudiya Arabistoni, Buyuk Britaniya va JAR kengashning amaldagi a’zolari hisoblanadi. 31-dekabr kuni Jazoir, Marokash, Namibiya, Vyetnam, Maldiv orollari, Makedoniya, Meksika va Fransiyaning vakolat muddati tugaydi.
