Xalqaro futbol federatsiyasi (FIFA) Qozonning “Rubin” va Rostov-Donning “Rostov” klublari tomonidan eronlik hujumchi Sardor Azmunning transferi borasida taqdim etilgan hujjatlarni o‘rganib chiqib, futbolchining o‘zidan transferining haqiqiy kelishuvi va uning ilovalarini taqdim qilishni so‘radi. Bu haqda “Chempionat” xabar bermoqda.
FIFA yozda mojaro bilan “Rubin” klubidan “Rostov” safiga qo‘shilgan Sardor Azmunga tegishli hujjatlarni taqdim qilish uchun 4-noyabrga qadar muhlat berildi.
“Azmun ishi” bo‘yicha klublar o‘rtasidagi bahs FIFAning futbolchilar maqomi qo‘mitasida ko‘rib chiqildi. Qo‘mita Lozannadagi Sport arbitraj sudining vaqtincha qarorini tan olib, 2016/17-yilgi mavsumda eronlik futbolchi “Rostov” klubi sharafini himoya qilishini tasdiqladi. Ammo har ikki klub hamon Sardor Azmunni o‘z mulki deb hisoblamoqda.
Avvaliga “Rostov” eronlik hujumchini ijaraga olgandi. 2015-yilda tuzilgan shartnomaga ko‘ra, ijara muddati 2016-yilning 10-iyuniga qadar mo‘ljallangan va “Rostov” futbolchining transfer huquqini sotib olish imkoniyatiga ega bo‘lgandi.
Kelishuvga ko‘ra, “Rostov” Azmunning transferini sotib olishga qaror qilsa, Qozon klubi rahbariyati bunga qarshilik ko‘rsatmasligi kerak bo‘lgan. Azmunning aytishicha, “Rubin” shartnomada belgilangan pul evaziga uni “Rostov”ga qo‘yib yuborishga rozi bo‘lmadi va shu tariqa kelishuv qoidalarini buzdi. “Rubin” klubi transfer yuridik kuchga ega ekanini tan olmayapti.
Izoh (0)