O‘zini “kosmik startap” deb hisoblovchi Yaponiyaning ALE kompaniyasi 2018-yilda jahonda birinchi meteoritli mushakbozlikni uyushtirmoqchi. Bu haqda “Interfaks” xabar bermoqda.
ALE yuqori texnologik shouni o‘zining sun’iy yo‘ldoshi yordamida amalga oshirishni rejalashtirmoqda — yuzlab sun’iy meteoritlar bilan to‘ldirilgan kosmik qurilma 2018-yilda orbitaga olib chiqilishi kutilmoqda.
Mushakbozlik aynan qachon bo‘lishini tashkilotchilarning o‘zi belgilaydi — tadbir sun’iy yo‘ldoshning yirik shaharlar ustidan uchib o‘tish davriga to‘g‘ri kelishi kerak. Va’da berishlaricha, sun’iy meteorit yomg‘irini haqiqiysidan ajratish oson bo‘ladi.
Sun’iy yo‘ldosh tashlaydigan kapsulalar haqiqiy meteoritlardan ko‘ra kattaroq bo‘ladi va ularga nisbatan sekinroq harakatlanadi. Shu sababli ular atmosferaga kirish vaqtida anchagina yorug‘ va uzoq vaqt nur sochadi, har xil rangli “meteoritlar”ni 200 kilometr masofadan ko‘rish mumkin bo‘ladi.
Mish-mishlarga ko‘ra, ALE o‘zining birinchi rasmiy “samoviy” mushakbozligini 2020-yilda — Tokio Olimpiadasining ochilish marosimida tashkil etishga tayyorgarlik ko‘rmoqda.
Biroq kompaniyaning o‘zi uning xizmatlaridan xususiy shaxslar ham foydalanishiga umid qilmoqda — badavlat kishilar shaxsiy tantanalari uchun orbitadan yog‘iladigan sun’iy meteoritlarga buyurtma berishi mumkin.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)