Do‘stona qo‘shnichilik munosabatlarini mustahkamlash maqsadida 26-oktabr kuni O‘zbekiston delegatsiyasi Qirg‘izistonga tashrif buyuradi. Bu haqda “Gazeta.uz” xabar bermoqda.
O‘zbekiston tomonining taklifi bilan 1-oktabr kuni Qirg‘iziston bosh vazirining birinchi o‘rinbosari Muhammadqali Abulg‘oziyev boshchiligidagi qirg‘iz delegatsiyasi Andijon viloyatiga tashrif buyurib, o‘zbek-qirg‘iz munosabatlarini mustahkamlash va rivojlantirishga qaratilgan tadbirlarda ishtirok etgan edi.
O‘zbekiston delegatsiyasining javob tashrifi Qirg‘izistonning chegaradosh O‘sh viloyatiga bo‘ladi. Rejaga ko‘ra, delegatsiya O‘sh markaziy maydonidagi bayramona madaniy tadbirda qatnashib, Qirg‘iziston xalqlari assambleyasi vakillari bilan uchrashadi. Bobur nomidagi dramatik teatrda mehmonlarga “Manasning Semetey o‘g‘li” teatrlashtirilgan postanovkasi namoyish etiladi.
O‘sh markaziy maydonida O‘zbekiston delegatsiyasi qishloq xo‘jalik mahsulotlarini ko‘zdan kechirib, O‘sh davlat universitetining “Ak buura” o‘quv binosiga tashrif buyuradi va tibbiyot fakulteti talabalari bilan uchrashadi.
Tashrif yakunida delegatsiya vakillari “Sulayman-Too” tarixiy-etnografik majmuasida bo‘ladi. Uchrashuv yakunlari bo‘yicha delegatsiyalar ikki tomonlama hujjatlarni imzolashi kutilmoqda.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)